مش لازم عنوان بقى !

عارفة يا مدونتى يا حبيبتى ؟

أنا لو منك ...أقدّم طلب إلغاء الأكونت بتاعى على جوجل و بلوجر

مزهقاكى و مبجيلكيش غير فى أوقات التناحة

بس عارفة برضو ؟ انا حياتى فيها فيس بوك و تويتر (حديثا ..و لسه مليش فيه اوى ) ..

بس انت دايما بالنسبة لى (الصديق وقت الضيق) ....

يا كهفى الجميل ..يا كهفى البعيد ... و أجمل حاجة فيكى ان مفيش حد بييجى هنا :D

اه و الله ..كأنى عملت تمويه انى مبكتبش ..فـ الناس تبطل تيجى و تزورك ..و بعدين ألف و ارجع تانى افضفض انا على روقان

المهم ..خدى بوسة منى ..انت مؤنث :))

على فكرة انا مش رايقة كدا زى ما باين فى كلامى ..تقدر تقولى حلاوة روح ..هاااااااه

ندخل فى الجد بقى و نرجع لمرجوعنا يا صوتى الداخلى و أسطورتى التائهة و يا حلمى المرتبك
-----------------------------
كلام مبعتر كالعادة .. و متقوليليش (لمّيه)

عن المخلوقات و الجماد ...مش عايزة قلبى يتعلق بيهم ...

لأسباب كتيرة منها انهم من المتغيرات ..و انهم مش فاهمين نفسهم ولا انا فهمانى فـ نلخبط بعض زيادة ليه ؟!

انتى عارفة انى ببعد الناس عنى ؟!

انا شخص بيقدر يعمل بجدارة حواجز غير مرئية بينى و بين البشر ..غير مرئية لكن صلبة و تكاد تكون ملموسة من شدة صلابتها ..

انا بخوّفهم منى ..مش عايزاهم يقربوا ..لانى مش هاستحمل انى احبهم ..و بعدين يزعلونى و يتغيروا كالعادة ..

مش هما بس اللى بيتغيروا ..ما انا كمان ..اه و الله ..مبنكرش ..

فـ مش لازم نوجع قلوب بعض ...خلينا كدا خفيف خفيف

اوقات ببقى عايزة اقولهم (معلش متزعلوش منى ..انا مقصدش اضايقكم ..انا باحميكم منى و بحمى نفسى منكم ..

انا مش شخص غلس و بيكره الناس ...انا بس اتحبست فى قلعة حواليا و مبقتش عارفة اعدّى بره سورها ..

انتوا اوقات كتيرة بتكونوا لطاف و كويسين و قصدكم خير و بتحبونى بجد ...

بس انا مبعرفش اقول لحد حاجة غير اللى حساها ...ده درس لحمايتكم ..

معلش معلش ...نصيبكم انكم قابلتونى ...المهم يفضل بيننا الاحترام المتبادل ...

يمكن اخف و ابطل خوف ..يمكن ...

الحكاية برضو انى اوقات بحاول اكون جاهزة للرحيل ... و ده بيحتاج ان التعلق بالناس و الاشياء يكون بره قلبى ..

الحمد لله ...

اللى بعمله بلاقيه ...خير او شر ...بلاقيه فى وشى ...

خير ان شاء الله ...

تانى ..انا معنديش مشكلة مع اى حد فيكم ..تماما ...خليكوا فاكرين كدا كويس ...و عمرى ما قلت عن حد فيكم غير الخير ..و لو حسيت بحاجة تضايق بشيلها جوايا ...لحد ما تتمسح

-------------------------
على فكرة ..

بكرة ان شاء الله لو عشت و كان لى عمر

هاقفّل 23 سنة على كوكب الأرض ...قارة أفريقيا ...مصر المحروسة ..باستثناء زيارة اسبوعين لاندويسيا :D

20/8 ... هل الرقم ده ليه اى دلالة ؟

الله أعلم ....

هاعيش بعدهم اد ايه ؟

هاعمل ايه فى اللى فاضل ؟

ربنا هيقبله منى ؟

هتحصلى مفاجأت ؟

هاحس بفرحة تصحى قلبى من غيبوبته ؟

برضو الله أعلم

اللى عارفاه ان ان شاء الله ماما هتعملى تورتة الملفاى اللى بحبها ...

جميل ان عيد ميلادى فى رمضان :)

يارب تكون سنة جديدة روحيا و علميا و عمليا و ميلاديا :))

فرصة سعيدة ..اشوفك على خير ..لسه معرفش امتى

ملحوظة ..ممكن ابقى انقل فيكى كل الحاجات اللى كتبها فى نوت عالفيس بوك ...

انتى بنت حلال برضو تستاهلى ادلعك شوية :D

خلصت الاختيارات

كدا مبقاش فى اختيارات

انتهى

مش هاقدر اتعامل و لا اتعايش

مليش أمل غير فى حياة جديدة تماما ...

كل اللى اتكسّر و اتدغدغ مش ممكن يتصلّح

لازم كله جديد فى جديد

و إلا هاقضى اللى فاضل

defensive & extremely guarded

و دى متبقاش حياة ولا عيشة

على الاقل مكنش ليا يد فى البداية

أبسط حقوقى فى الدنيا انى اختار طريق ألطف يودّى لنهاية مختلفة

الفكرة لعبت فى دماغى كتير قبل كدا بس اكترهم المرة دى

كفاية تجميل فيما هو قبيـــح

فاضل بس اقضّى الشهور اللى فاضله

يااااارب ...وفقنى و الاقى الطريق الجديد ...البعيد جدااا عن كل اللى أعرفهم ...

الإزعاج المستمر

كالعادة

جاية اكتب حاجة مش عايزة حد من اصحابى اللى عالFacebook
يقراها ..بس لازم اخرج الشحنة المزعجة اللى جوياا

و الله كنت راجعة كويسة و زى الفل ..و رايقة و مش حاسة باى حاجة

سؤال خطير ...

هما البنىءدامين بيعملوا فى دماغ أهلى كدا ليــــــــــــــه؟

هل هى مؤامرة لتحطيم أعصابى على صخرة الصبر ؟!!

مشكلتى الرهيبة انى عايزة اكون جزء من شىء منظم ...

بكافح بكل وقتى و مجهودى و حياتى علشان كدا

و مش عايزة ادام ربنا اكون جزء من كيان مهرجل ملخبط بيأذى الناس اكتر ما يفيدهم

لكن الناس مش عايزة تسيبنى فى حالى ..كأنى عدوتهم !!

و مشكلتى التانية انى دايما بضيّع حقى مع الناس انى (مبحبش) اشتكى بنىءادم لـ بنىءادم !!

لكن البنىءادمين ميتوصوش أبدا و بيشتكوا أى حد لكل حد !!

فـ باطلع انا واخدة دور الممثل الصامت ...و بما انك ساكت تبقى معندكش حاجة تقولها ...
يبقى منطقى انك انت الغلطان و تستاهل ستين ....!!

مليش دعوة

مش هعامل الناس بمعاملتهم ...علشان مش هينفع ..
مش هينفع كل ما يعكّوا اعك !ّ

فى اللحظة دى كل كائن حى يعتبر عبء نفسى عليا ...

فعلا مش فاهماكم ..او فاهمة بس مش متخيلة انكم حقيقين مش بلاستيك او شمع !!

سيحوا سيحوا سيحوا ..

انصرفوا انصرفوا انصرفوا

دعونى و شأنى يا بنىءادمين !

مش عايزة منكم حاجة ...و الله ما عايزة منكم حاجة ...

سيبونى بس احاول فى حياتى من غير إزعاج غير مبرر !!

يا ساتر !!

انتوا ازاى بتخلوا الانسان يتضايق اوى كدا فجأة !!

صحيت فجاة و جيت هنا

واحدة من نوبات الصحيان المفاجىء بالليل

اكتشف فيها انى استحق(فسحة )

بفكّر احضر

AUSSS CARNIVAL - TALENT SHOW 2011

==================================
كل حاجة هتيجى فى وقتها

القطر ماشى بسرعة على اد ما يقدر بس صعب يوصل محطة قبل معادها ...

هوّنى على نفسك

عارفة مشكلتك ايه ؟!

انك بيحصلك زى ما بيحصلك مفاجآت و عثرات على طول الطريق

و برضو تزعلى من نفسك انك مقدرتيش تعملى كل مسئولياتك على اكمل وجه فى الوقت المحدد

مع ان البشر بشر مش سبايدرمان ..و لا سوبر و لا بات و لا....

اه صحيح ان لسه فى حاجات كتيرة تقدرى تعمليها ..و لسه معرفتيهاش

لكن برضو تعرفى انك بنىءادم بيمرض ..و يتعب ..و لما تحصله الحاجات دى بيحتاج وقت علشان يرتاح و يخف

ازمتك انك مبتقتنعيش ان ده تفسير !!!

و بالتالى مش هتستخدميه كعذر

ربنا يهديكى ..
==========================
فاكرة النوت اللى كتبتيها السنة اللى فاتت فى وقت قبل اليومين دول بشوية

دى من اكتر الحاجات اللى حبتها منك فعلا

و عندى أمل انك تنفذيها فى يوم من الايام

علشانك

مس علشان الناس

النوت دى ...كتابى العشر صفح بحالهم
=====================================================

نفسى رايحة على تأليف كتاب يكون من عشر صفح بس..فعلا رغبة ظهرت فجأة و حاسة إنى لازم احترمها او على الأقل احترم التفكير فيها...

ناقص بس شوية حاجات فرعية كدا مش ضرورية عشان الكتاب يطلع ..زى هوا انا هاتكلم عن ايه فيه..او انا هاعمله ليه اصلا..و يا ترى الكلام فيه يكون قطع كدا على بعضها..و لا جمل فى شكل نقط..او بس كلمات..كل كلمة لوحدها مستقلة بذاتها..

كمان بفكر فى حاجة مهمة جدا...

اعمله بـ(جلدة) ولا لاء؟ لو من غير,هيبقوا عشر صفح شوية هوا يجيبهم و عطسة توقعهم تحت مكتب اى حد أو ورا سرير أو عالأرض فى وسط ميدان و أفضل مصير ممكن يكون بلاعة!!..و الأسرع أن حد ياكل عليهم طعمية ..لالالالا ...

أنا هاعملهم بـ جلدة تخينة عشان يبقوا ياكلوا عالجلدة و يسيبوا العشر صفح بتوعى نضاف...

طيب و بعد الجلدة...بالنسبة للمحتوى أنا عاجبانى فكرة الكلمات ..الكلام يتكتب كلمة واحدة أو كلمتين..

ممكن اكتبهم فوق بعض(أو تحت بعض)...أو متبعترين بلا هدف فى وسط الصفحة..اه أنا هاكتبهم فى دواير...كل دايرة بلون و جواها كلام له علاقة ببعضه..

و لو طلبت معايا اغلس عالناس ممكن اكتبهم ملهمش علاقة ببعض بتاتا..

هاكتب عن حاجات كتير..

ممكن اكتب أول اسم من الناس اللى كانوا مهمين فى سنواتى المعدودة..

عن الشوارع و الأماكن اللى رحتها كتيـــــــر( أوى حبتها أو محبتهاش)..

و عن الألوان اللى لبستها..احط بين قوسين 3 الوان..

الأهم إنى احط الالوان الشنيــعة اللى لبستها مع بعض و أنا بكامل ارادتى و واعية..كنوع من الغلاسة على المجتمع..بس دول بقى اكيد هيكونوا أربع ألوان فما فوق بين القوسين...

اكيد لازم اجيب سيرة الناس اللى (ألشوا)عبر التاريخ....دول مهميــــن أوى ..كفاية الاسم الأول من كل واحد فيهم عشان الفضايح و القضايا...

بفكر اكتب الأحداث المهمة اللى حصلت فى العالم وقت ما عشت..

و بما إنى جزء متواضع جدا من العالم..ف هالخص أحداثى فى 8 صفح بس...ممكن أكتب اسم المكان اللى حصل فيه الحدث و تاريخه و اسيب الناس تدور و تبقى دى قضية حياتهم..

أو اساعدهم بغموض اكتر و اخلى الحدث كله ارقام..زى فيلم (نووينج) بتاع نيكولاس كادج..اكتب تاريخ الحدث و احداثيات المكان اللى حصل فيه و لو فى ضحايا ممكن نكتب رقمهم(زى يوم امتحان عملى الباطنة مثلا)..بس هابقى على أدى و بكتب(ماضى من غير مستقبل)..

و حد يقرا الأرقام و يحلف لـيفك شفرة العالم ..و تعدى سنين حياته و أنا نايمة فى سريرى تحت الأرض باضحك عليه نياهاهاهاهاهاههاهها...

و يفضل العالم متشفر ..قال يعنى لو فكوا الشفرة هيفهموا اللى هيشوفوه..و لو فهموه هيعرفوا يغيروه..

المهم بقى..

لإنى شخص أوقات وطنيته(ساعة تروح و ساعة تيجى) ..هاكتب الاسم الأول من اللى حكموا المصريين بمزاجهم(هم تعود على مين يا ترى؟!!)..

طبعا الموضوع هيوسع منى اوى و هاحتاجلى ييجى عشرتاشر صفحة كدا...بس لاء...انا ميزانيتى فى الورق محدودة..هما عشر صفح ..هاديها منهم مساحة ربع سطر يتكتب فيها نقط فاضية..عشان أنا مهما حاولت مش هاعرف ادي سيرتهم حقها..

عوووودى يا بلية ..احسنلك !

ارجع للجزء المتواضع من العالم..انا هاكتب كلمة واحدة تعبر عن المواقف اللى كنت فيها إنسانة..و عن اللى كنت فيها(.....)كفاية اقول انى مكنتش كويسة...

ابعد شوية عن الموضوعات و ارجع اتكلم عن الشكل..

يا ترى االصفح تكون مربعات زى كراسة الحساب..و لا خطوط عريضة زى الانجليزى.أو صفحة سطور و صفحة فاضية زى الجغرافيا...

احنا كبرنا على كل ده..نعمله زى ورق الكبار...طب يعنى ايه؟؟

كشكول كبير بـسلك..و لا ورق فلوسكاب...اخليه احسن ورق ابيض أو ألوااااان..لو لقيت مشجر حلو مش هاستخسر...اوببــــــــا..مخرم و لا لاء؟!

دول عـــــــشـــــــــــر صفح ياناااااس...اه عشرة..

بس ممكن اعمل الصفحة متر فى متر...أو بس أد كف الايد..يعنى كلام كتير كبير ملزق..او بس حروف و كلمات مفرطة ماسكة براحة فى ايد بعضها...

..

اعملهم طوااال يادوب يتعلقوا جوه بيتك فى برواز و تعيش و لا عمرك جربت تقراهم فى خمس دقايق..أو نوتة صغيرة تكون صاحبة جيبك دايما!

عودة تانى للحاجات اللى ممكن اكتب كلمة واحدة عنها..

هأبذل مجهود ذهنى عشان أجمع المواقف اللى اديتنى حالة من (السلام العقلى) ..النوع الأصلى اللى بيقعد ايام مش المضروب اللى مالى السوق و بيختفى بعد كام دقيقة....

قريب منها ممكن اكتب كام كلمة عن الحاجات اللى أجبرتنى على (الصمت) اللى ممكن يكون معاه (سلام عقلى) أو على العكس(هياج عقلى)...

فى دكاتره أعجبت بعلمهم و خبرتهم و حكاويهم...الاسم الثنائى من كل واحد فيهم هيكون كشاف يساعد حد يدور عليهم و يشوفهم بيتكلموا فين و يسمع لهم..

فى ناس مينفعش أنساهم...زى الاسم الاول على الاقل من العيانين اللى هاشوفهم فى حياتى و هاقضى معاهم فترة كبيرة و انا بحاول أحل فزورة مرضهم...دول غاليين عليا من قبل ما أعرفهم...

عارف المرات اللى مش قليلة اللى كنت على وشك يجيلى تسمم و أنا بأكل فى مكان ما شىء ما ...ممكن اسم المحل و عشان محدش يزعل هأكتب فوق (احلى الوجبات) و انتوا تفهموا انا اقصد ايه ...

مشكلتى انى مبقتش بقرا عدل ..بس يمكن لو رجعت اقرا تانى كويس ..اسامى الكتب فى دايرة لونها اخضر أو بنى هتكون مفيدة...

كان فى بالى حاجات اكتر اجمل و اهم اكتب عنها ..بس عقلى قرر يدوس شط داون ..

الوقت المتاح لتأليف العشر صفح و تقفيل الكتاب يبدأ من دلوقتى و لحد يوم رحيلى النهائى اللى بلا رجعة و( بحق و حقيق) و( مش هزار)..اليوم اياه ده اللى الدنيا هتنور فيه زيادة و الناس هتاخد نفس عميـــق و زفير قوى..

و ده فى نظرى مش يوم بعيد...كمان 10 نقط(أبين زين أبين)..ثوانى..دقايق..ساعات...أيام...شهور..سنين..عقود (و ساعتها هابقى رئيسة نادى المعمرين فى الأرض)

يوم و خلاص متشغلش بالك..

أو يمكن ملحقش اخلصه..و حد يكملهولى من بعدى...

لما يخلص هاوزعه عليكم فى الاتوبيس زى اللبانة...و مش هاستنى مقابل

اقروه انتوا بس

===================================================

لو حد عنده اقتراح لكتابى العشر الصفح يقولها..انا مستعدة اقراها لحد يوم الرحيل ان شاء الله

ممكن ابقى ارجع فى وقت لاحق اكمل باقى الحاجات اللى لازم تتظبط فى كتابى العشر صفح..دول مش اى حاجة

مين فينا كان يحلم يألف كتاب عشر صفح بحااااااااااااااااالهم :D!!!!

عن الرحيل الغير معلوم

سأجاهد لأكتب شيئا ما

لماذا ؟!

ليس لعلم غزير أو ثقافة واسعة أو خبرة عظيمة

و لكن لأننى أعلم بأن الكتابة ..و (التنفيس) يظبطان إيقاع أنفاسى

التنفيس يجعل مجرى الهواء أوسع و الرئتين أكبر ...

فيخفف من ضيق الصدور ..

المريب فى الأمر هو اختفاء الأفكار كلما اقتربت من المدونة أو أمسكت قلما أو حاولت فتح فمى !

كأنها فى حالة ذعر !

هل هناك ما يدعو لذلك ؟

لم يقهرنى أحد ..لم و لن أسمح لأحد إن شاء الله

لذلك سأحاوال جاهدة أن أكتب ..

حتى تصبح كلماتى و أفكارى أكثر صحة و نضارة

و لا يقيدنى شىء فأنا لست فى مرحلة ترويج للمدونة و لا أفرض على أى عقل أن يقرأ ما أسطره

و لا أحمل أى توقعات ممن سيصدف و يقرأون محاولاتى المتعثرة

لنبدأ
-----------------------------------------------------------

(حاسة ان أيامى بقت قصيرة أوى )

و كان رد أخى (ايه؟! قصدك اليوم بقى قصير و لا عددها كلها ؟!)

ارتبكت ..

(امممم ..الاتنين ..مع انى مكنتش اقصد التانية ..بس الاتنين فعلا)

هذه الأيام بدأت تعود نفس الخاطرة على عقلى .....مجددا

كانت عادة ترتبط بحادث معين ...

و الان أصبحت الاحداث التى تدعونى للتفكير فى اقتراب النهاية فى تزايد مستمر ..تزايد كما و كيفا

فى العالم كله ...

ما حدث فى اليابان ...

ما يحدث فى العديد من الدول العربية ...

ما يحدث منذ عقود فى فلسطين ....

السودان المقسمة ...

ما يحدث فى بلاد لا أعرف منشأ مشكلاتها و لكن تتكرر أسماءها (فييتنام ..ليبريا ..رواندا ...و غيرهم كثيرون)

ما حدث و لا زال يحدث و سوف يحدث فى وطنى بعد ثورته التى أضاءت كلمات كادت تندثر فى عقول أبناءه

مثل (طموح ..حلم ...كرامة ..حرية ...بلدى... حقى...صوتى.../و كل ما يلحق تلحق بيه ياء الملكية/...انتخاب...شعب ... شرطة ...عدل...شفافية...و عشرات الكلمات )

و ما يحدث كل لحظة فى العالم من وفيات و أمراض لا حصر لها أو لأسبابها

توقفت عن التحدث إلى أى شخص فى هذا الأمر ...فليس هناك ما هو مقبض لقلوب من أعرفهم من سيرة الموت و الرحيل عن الحياة

فى حين أجدها أكثر المواضيع ترددا على عقلى ..فى أحلامى..فى صمتى ...و أنا أتعلم ...فى عملى ...

لا أعرف مكان يبعدنى عن التفكير فيه ...

و مع ذلك أدرك أن أخطائى فى الحياة لا تتوقف مما يجعل مهمة الاستعداد للرحيل أصعب !

بعض الأحيان كانت تأخذنى فكرة تخيّل حياة من أعرفهم بعد رحيلى

ثم أعود و أقول لنفسى (هوا ده اللى فارق معاكى؟!)

(الحقيقة...هازعل منى لو ده اللى فارق معايا...هما حياتهم هتكمّل ...هيفتكرونى شوية كتير فى الاول ..و بعدين شوية أقل ..

و بعدين فى يوم ميلادى أو يوم رحيلى بشكل ثابت لفترة...

و بعدين لما عينهم تقع على اسمى لو كان مقدر ليه يتكتب فى مكان قريب من عينيهم )
------------------------------------------------------------------------
لا أستطيع إكمال التدوينة ...مشتتة و على لسانى (أعوذ بالله من الشيطان الرجيم )

مقولة 1

لم يتوصل العالم إلى شىء يمكنه غسل و تنقية الروح الإنسانية مثل دموعها !

الصمت يحمينى منى

عن ما أشعر به و يغضبنى منى

كلما أظن أننى عقدت الصفقة و نجحت فى اتمامها ...أفاجأ بالفشل

ظننت أننى تصالحت مع نفسى

فلم تعد تغضبنى نفس الأشياء

و لم يعد للحزن مكانا بداخلى

كذلك الفرح أصبح لفظا لا معنى له

و ظننت أن كل الأشياء تساوت فى المقدار

فلم يعد يهم ما يحدث و ما لا يحدث

و أن اللامبالاة صارت من صفاتى الأساسية

بعد كل هذه الظنون

أفاجأ أننى خدعت نفسى

وأن أتفه الأحداث قادرة على إغضابى

و لكن

لا بد من وجود شىء قد تغير بداخلى

لا يمكن ان تكون كل هذه الظنون سراب

فى الحقيقة ...

هناك شىء واحد يمكن اعتباره من المستجدات التى ليست أوهام

أصبحت قادرة على الصمت كما أتمنى

ليس لضعف أو قلة حيلة ...

ليس ليأس أو لا مبالاة ..

و لكن بكامل إرادتى أستطيع أن أصمت لفترة طويلة

حتى و أنا حانقة فى هذه اللحظة ...

أتلذذ بالصمت

و أعرف أن من أخطأ و تسبب فى إغضابى لا يستحق أن أنطق بكلمة واحدة لا تليق بى

و قد تقلل من شأنى أمام نفسى

لذا ..فقد قررت أن أكتب هنا ...فى بيتى المهجور ...فى كهفى البعيد

و لن أخبر أحدا عما كتبته ..و لن يشعر أحد بشىء مما يجول بخاطرى الان

فقط أنت يا مدونتى ...

أعدك بالصمت ...

من أجلى ...

فالصمت يحمينى منى !

ضلالة تحتمل الصواب !

و أخيرا تأكدت ضلالتى المستمرة ...
ما ظنه الكثيرون جنون ..

هناك مقولة معناها انك اذا صممت على خطأ ما قد يأتى يوما و تصيب !!

و ها أنذا قد أصبت

عادة لا يسعد الناس لمثل هذه الأخبار..

لا أعرف لماذا أنا متطمئنة !!

----------------------------------------------------
الحوار المتكرر فى عقلها ...و تخجل من الإفصاح عنه لأن البشر يكفيهم ما بهم من مخاوف
و هى لا تعلم إن كان ذلك ضلالة أو حقيقة ...هى تنتظر